25 .حادثـــة مركـبة البرلس
كلــمات الفيلســــــوف الشاعر
&&&&&&&&&&&&&&&
1
قالت لى مراتى ياراجل قوم شوف الراديو بيقول ايه؟
قلت ياشيخــــه كلامهم فاضى ابصر ايه ومدرك ايه
قالت بيقولوا المركب غرقت ف البحر على الشط هناك
اوعى يكون عبد الهادى ابنك منهم وخد بدر وشوقى معاك
قول قمت أطس وشى بشوية ميه وفتحت عينيه وبرقت
لقيت التلفزيون جايب صورة شلة من الناس وفيهم رفعت
&&& &&& &&&
2
قالوا حادث لان المركب كانت شايله ناس وبنى آدمين يامه
قمت لبست الجلابية اللى حيلتى وطرت ماتقولش يمامه
ورحت رشيد وكان وياي اخويا عيد وصلنا قبل المغرب
اصله ولاده رضا وعبد التواب كانو راكبين ف نفس المركب
ولما سالنا عليهم قالوا ربنا يســــتر هوه اسم ابنكوا ايه
قلت أسمه عبد الهادى دافع له خمسه وعشرين الف جنيه
&&& &&& &&&
3
وجم سعد ورمزى وزغلول وعبد الفتاح كمان ومراته وياه وبناته
وناس كتير كانت مهاجره وسيد أبو كوع رجع وفرحنا بنجاته
ومدام هنا ميت وهناك ميت والواحد عارف انها رحلة موت
وسيد قال انه هيحاول تانى وتانى وحتى لو كان مصيرة الموت
قلت لهم آه يانى طب عبد الهادى اخباره ايه يا جماعة الخير
قالوا من المفقودين ما تخافش ها نذيع اسماءهم ف صباح الخير
&&& &&& &&&
4
أصل محمد كانت أمه بتغسل كلية فى الاسبوع تلات مرات
وكان أبوه ميت وهوه لساه صغير وسايبه له أربع أخوات
اما سعيد كان واخد جامعه وشغال على توكتوك هوه وجابر
يصحى يوماتى ف البدريه يشقى ويتعب شاكر ربه وحامد صابر
أما هنيه بتبيع خضره على راس الشارع ومتجوزه عبد الفتاح
سافر لاجل يخف من فيروس سى وبيدعى ربنا هوه الفتاح
&&& &&& &&&
5
اما عطيه فكان واخد دبلون ومتعلم قال اسافر لجل اكون نفسى
وأرجع أتجوز البت فاطنه وأفرح واجيب لها كل اللى ف نفسى
لكن موش عارف ليه الواد حسن كان بده يسافر ابن أبويا بركات
علشان موش عايز يفلح فى الارض وداخ على وظيفة سبع دوخات
أما حسين كان عايز بيت بدل العشه الى قاعد فيها هوه واخواته
سافر بلاد الله لخلق الله لكن المركب غرقت وبلغوا أهله بوفاته
&&& &&& &&&
6
قوم اتنهدت نفس حار من جوه القلب بيكوى كما التنين وقلت غتونى
ياناس حدش شاف عبد الهادى وياخد كل اللى معايا ان شالله هدومى
قوم رد عليه الواد على ابن امى بهانه وقالى هوه انت حيلتك حاجه
آه يا مسكين دول مصمصوا عظـــمك ونسًٌَُلوا لحمك ماتقلش دجاجه
قلت طب عبد الهادى أبنى مفقود ولا غرقان وضايع ف ملكوت الله
قالوا ماتخافش ان شاء الله شــهيد هوه واللى معاه قول ان شاء الله
&&& &&& &&&
أرجـــو أن تعجبكـــــــم كلماتى ولكـــم عاطـــــر تحيـــاتى
حادثة مركـــــبة البرلس ــ من ديوان يا أم الطاقـية الشـبيكة
ليست هناك تعليقات:
إرسال تعليق