1.حكـــــــايات ميمى
قصص أطـــــفال للكبار
بقلـــــم مجدى عيسى
&&&&&&&&&&&&&
بصراحه يا جماعة الخير انا مش عارفه ابتدى الحكايه من فين من الاول ولا من الاخر ، عموما انا ها حكى ليكم الحكاية من دلوقتى وأحب اعرفكم بنفسى انا ميمى لأ اقصد انا مريم وعايزاكم تسامحونى اذا الاسم سبب لكم لخبطه فى الاول وكنتم أفتكرتونى ولد لأ انا بنوته حلوه وزغنطوطه واخر حته من اسمى مافيهوش طوطه .
المهم انا بصراحه بحب الرغى والحكايات والحواديت ، يمكن عشان انا طالعه فى بيت بيحب القراءة والكتابه ماعلينا انا ها بتدى الحكايه من النص زى ما اتفقنا ، او زى ما انا قلت لكم المشكله انى مش عارفه ايه الحكايه او الموضوع الدنيا كانت هدوء تام وما فيش الا بعض الاصوات الخفيفة اسمعها كل فترة لكن من ثوان حصلت حاجه غريبه جدا .؟؟؟؟
بداية لقيت واحده ماسكانى من رجلى وعماله تشد فيها وكانت عملاقه جدا طولى كده ست او سبع مرات ، ولما شفتها استغربت خالص لانها لما مسكتنى رفعتنى فى الهوا بقبضة يدها وبأيد واحده ، ومش هاتصدقو عملت ايه اه والله عارفين عملت ايه ؟ قعدت تضربنى بكل قوتها وانا ابكى وأصرخ واستغيث لكن ما فيش رحمة .
المهم ياجماعة الخير لقيتها بتتكلم بصوت جهورى كانها انتصرت فى معركه رغم ان الفرق بينى وبينها شاسع فى الحجم ، المهم قالت كأنها شيلسى لاعب الكورة ودخل جون من اربعين يارده الف مبروك ياجماعه ربنا رزقكم بنت وزى القمر .
بصراحه انا كنت زعلانه منها وكنت ناويه اعرف اسمها وعنوانهاعشان لما اكبر آخد تارى منها لكنها لما قالت زى القمر سامحتها على طول لانى شعرت بالخجل والكسوف وانتم طبعا عارفين البنات حساسه قد ايه وكمان حنينه خالص .
&&&&& &&&&& &&&&&
أرجـــو أن تعجبكـم كلماتى ولكـــم عاطـر تحيـاتى
من كتاب حكـايات ميــمى قصص أطــفال للكـــبار
ليست هناك تعليقات:
إرسال تعليق