2 .حكـــــــايات ميمى
قصص أطـــــفال للكبار
بقلم مجدى عيسى
&&&&&&&&&&&&&
المهم ياجماعة الخير لان فى ناس كتيره قوى وزحمه ودى تشيلنى ودى تحطنى ودى تدعك فى جسمى بمطهر وبرضوا ما عرفتش ليه كانو جايبين ميه سخنه ، فى كل الافلام يقولو هاتوا ميه سخنه لكن مش عارفه ليه ؟ ماعلينا المهم لفونى فى بطانيه ناعمه وريحتها حلوه ومرسوم عليها توم وجيرى بتوع والت ديزنى .
بس بصراحه انا كنت مستريحه اكتر وانا فى المغاره اللى جو الجبل ، وكنت اتعودت عليها خلاص خصوصا بعد ما قعدت تسع شهور ، كان هدوء وما فيش دوشه ولا هيصه ولا ازعاج وكل ما اجوع الاقى الاكل يحضر على طول ، صحيح فى الشهر الاخير المكان كان ضيق خالص وحسيت انى مخنوقه ومضغوطه لكن ااقول ايه بقى ما علينا .
نرجع للحكايه من النص تانى واحده شالتنى كده بالراحه وفرجتنى على واحدة تانيه كانت نايمه على السرير ولما بصيت فى وشها لقيت وشها كبير قوى وعليه حبات من العرق كتيره ، وشعرها غارق فى الماء كأن توها خرجت من البحر ولما فتحت عينيها بصت ليه بحب وحنيه كانها تعرفنى من زمان .
بصراحة يا جماعة صعبت عليه خالص ولقيت الدمعه هاتفر من عينى ،وبعد ين فرت دمعه واتنين وتلاته من عيونها هى ، ولقيتها بتحضنى كأنها عايزه تدخلنى جوه قلبها فلقيت قلبى بيدق بسرعه وحاسه انى مش عارفه ااقول ايه ، المهم قلت أعيط وهيه هاتفهم .
سمعت واحده بتقول رضعيها يا أم مريم وسمى الله ، لكنى ما فهمتش تقصد ايه ؟ قلت عموما ان غدا لناظره قريب ، وما فيش ثوان الا ولقيت وجبة الفطار جت كوباية لبن دافيه وحلوه مع فيتامين الحب والعواطف وكاملة الدسم والحنان والفرح .
&&&&& &&&&& &&&&&
أرجـــو أن تعجبكـم كلماتى ولكـــم عاطـر تحيـاتى
من كتاب حكـايات ميــمى قصص أطــفال للكـــبار
ليست هناك تعليقات:
إرسال تعليق