4 .حكــــايات ميــمى
قصص أطـــــفال للكبار
بقلم مجـــدى عيــسى
&&&&&&&&&&&&&
فات أسبوع وابتديت اتعود على الدوشه بتاعة الناس دى ، وكل ما اكون عايزه حاجه اقعد اعيط واصرخ وهمه بقى يفهموا ، بصراحه ساعات كانو يعرفوا انا عايزه ايه ، وساعات ما يعرفوش ؟!
قوم بقى لقيت حطونى فى حاجه كده وولعوا شمع كتير وجت عيال كتير وقعدوا يلفوا حواليه ، يمكن لعبه جديده بيلعبوها ، وقعدوا يسقفوا ويخبطوا ، وقعدوا يضربوا بعض ويرشوا بعضهم بالملح وهمه بيضحكوا حاجه غريبة البشر دى افعالهم غير متوقعه .
وجت واحده ست قالوا ليه بعد كده انها تيته واقعدت تقولى اسمعى كلام ماما وما تسمعيش كلام بابا ، ليه هوه بابا لسه صغير زيى طيب ازاى ده ساعات لما يشيلنى الاقيه كبير قوى واكبر من ماما حتى ده مره بس فى سركم لقيتوا شايل ماما رغم انها اكبر منى شويه طبعا انتو عارفين .
عرفت بعد كده انهم كانوا عاملين عقيقه علشانى طيب انتو بتفكروا ازاى ياناس ده انا يا دوب باشرب لبن ؟! ها اكل لحمه ازاى ورز اما البشر دول احوالهم عجيبه وتصرفاتهم مش مفهومه خالص ، المهم قعدوا يدعوا لى انى ابقى ذرية صالحه وبنت صالحه وام صالحه واخت صالحه وزوجه صالحه طيب هيه مين صالحه دى ، برضوا ما كنتش فاهمه يعنى ايه بس قلت لما اكبر حابقى اعرف .
طيب استاذن منكم شويه عشان ماما بتنادى عليه وعايزه تغير لى ال ...طبعا انتوا عارفين فكل بنى آدم كده بعد الاكل لازم !!؟ معلهش يا جماعه اصلى بتكسف وبعدين هانام شويه ولما أبقى أصحى حابقى اقول لكم بقية الحكاية اوعوا تمشوا لسه الحكايه فيها مفاجات كتير .
&&&&& &&&&& &&&&&
أرجـــو أن تعجبكـم كلماتى ولكـــم عاطـر تحيـاتى
من كتاب حكـايات ميــمى قصص أطــفال للكـــبار
ليست هناك تعليقات:
إرسال تعليق