3 .حكــــــايات ميمى
قصص أطـــــفال للكبار
بقلم مجــدى عيـــسى
&&&&&&&&&&&&&
ازيكو يا حبايبى عاملين ايه انا النهارده فكرت احكى لكم الحكاية المره دى من اولها ، طيب ليه فى الاول ما رضيتش احكى لكم الحكايه من الاول لانى بصراحه مش فاكره قوى ، عموما انا لقيت نفسى باحلم انى فى مغارة وان الدنيا ضلمه وما فيش حد غيرى وانى لوحدى .
وقعدت افكر واسال نفسى طب الناس راحت فين ؟ اختفوا يمكن انا فى كوكب تانى طيب فين الكوكب الاولانى ؟ وحاجات كتير ما كنتش فاهماها ؟ وبصراحه انا لسه مش فاهمه ؟ لكن بأحاول اتعايش مع الحاله لغاية ما ربنا يسهل وافهم وطبعا ها اقول لكم .
وفى يوم لن انساه ومحفور فى ذاكرتى لانى شفت شخص زيى هوه صحيح مش زيى قوى لانه كان ولد لما قابلت الواد ده وبرضه كان عايش فى مغاره زيى كان عند الدكتور وسالنى اسمك ايه فقلت له اسمه ميمي فقال انت يا ميمى اول ماشفتك كده كأنك أميرة ، فشعرت بالاحراج ده بيعاكس ده ولا ايه ؟ ايه النضج المبكر ده ، وبعدين سالنى شوفت حد تانى فقلت له لأ أنت أول واحد ؟
لقيته ضحكه ضحكه كبيره وقال الله يعنى انا وأنت زى آدم وحوا فقلت له يعنى ايه قال مش عارف ، بس انا سمعت بابا بيقول ان ادم وحوا اول اتنين كانو موجودين عل الارض وانهم كانو بيحبوا بعض ولما سالته يعنى ايه ؟ قال لما تكبرى شويه حاقولك ، انت عندك خمس شهور وانا عندى سبع شهور واكبر منك يوم يعرف عنك بسنه ، هما بيقولوا كدا .
المهم بصراحه يومها حسيت باحساس جديد وحلو انى مش لوحدى فى الدنيا دى ، وان ممكن مع الايام اشوف حد ونبقى كده قد سبعه ولا تمانيه ياسلام حاجه جميله خالص ، وحسيت ان ممكن نعمل لعبه ونلعبها مع بعض مثلا زى الغميضه او لمس الحمام او كوتشينه اوحتى شايب !!!
وبعد شويه سالت نفسى دة انا عبيطه صحيح طيب هوه لما سالنى عن اسمى انا ما سألتوش عن اسمه ليه طيب ياترى اسمه احمد ولا محمد و محمود ولا مصطفى اصل نص الناس بتسمى الاسامى دى عموما انا ها اسميه امير طالما انا اميره يبقى هوه امير .
&&&&& &&&&& &&&&&
أرجـــو أن تعجبكـم كلماتى ولكـــم عاطـر تحيـاتى
من كتاب حكـايات ميــمى قصص أطــفال للكـــبار
ليست هناك تعليقات:
إرسال تعليق