حدثنا عيــسى بن هشــام ، ان صاحبنا السـكندرى كان قرفــان ، من الشـغل ومن الدوخـــان ، وقعــد يســـال نفســه ويقول لهــا ، طيب احب اعرف انت هاتحــس بايــه ، اذا كنت بتشـــتغل زى الحصــان ، بلاش الحمــار علشــان مافيش حد يزعــل ، وآخـــر المتمـــــه تلاقــــى واحـــد زميــلك عمال يترقــى ، وكمــان يخــلوه المدير عليــك ، رغم انه لســه ماطلعــش من البيضة ، ولــد فــرفور كـده وســيس زى ما بيقولــوا ، ويابخت من كــان المدير عمـــه ، وانا طبعــا اللى يتجــوز أمــى ، على راى ســـعيد صــالح فى المســرحيه ، اقـــول له يا عمــى . . . . . . . . ؟
ودايمـا تـلاقى فى ناس زى البـــصل ، ومحشــورة فى كل حاجــه ، بالذوق او بالعافيــة تــلاقى حاطــه مناخيرهــا ، وناس تانـيـه تـلاقيها عامــل زى التعـلب المكــار، دايمــا يلف هنا وهنــال وكمان محتــار ، وده طبعــا اللى بينقـــل للادارة والمـدير كل الاخبــار
وغير ه كثــير اصل احنــا المصــريين طبعــا بنرفع شــعار ان المليــان بيكـــب على الفاضــى ، فتلاقــى واحــد قاعــد بس يحــل الكلمــات المتقــاطعة ، والتانــى عمال يشـرب قهــوة ، وغيره بيكـــون فى جمعيـــه ، علشـان يقبضهــا الاول ويجــوز البت بهيـه ، والتانيه بتجـيب ف سـيرة فلانــه وعــلانه، ومش ســايبه حد ف حالـه ولا حتى الخــاله بهـانه ، والتالت عمال يحســد فى الرايح والجــاى ، فــلان كان وشـوف دلوقت عامل ازاى ؟ وطبعــا اللهــم لا حســد انا مش باحســد ولا حاجـــه ، احسـن حد يفتكـر ان عــينى مدوره ، ابد والله ده انا اصــلى حتة سـكرة . . . . . . . . . . ؟
وصـاحبنا اللى عنده ضمــير قاعد شـــــغاااااال ، ماتقولش ولا بوتجـاز يونيفرسـاااااال ، طول النهــار لما رأســه من على جســمه بقت مدلدلــه ، والبدلــه عليه من زمــان وكمــان بقت مبهدلــه ، ويلبس يا نظرى نضــارة زى كعب الكوبايــه ، والقلم دايمـا فى ايده وكمان برايـــه ، دنيــا وزمــان بقى ليهم العجــب ، كل واحد من الناس تقدر تألــف فيه كتب ، وأنت يا صاحبى مش عارف تعمــل ايــه ؟ تبقــى زى ده ولا دى ، ولا اولاد الايــه ؟ وتقعـد تشــد فى شـعرك ده لو لســه عندك شـــعر ، وما يكونش كلــه وقــع وبقيت اصــلع من كتر القهــــر ، وتقعـد تدعــى عليهم زى الولايـا ، ولا تحط ايديك ف بقــك وتعض عليها زى الصبــايا . . . . . . . . . ؟ ،
أقول لك كبر دماغك ،وأعمــل ودن من طيـن والتانيه من عجـين ، وفيه عندى فكـره لك كويســه ، ايه رايك تشوف واحده متريشـه وتتجــــوزها ، وهيه اللى تصـرف عليك ، وتسيبك خالص من موضوع الشـــــغل معاليك ، ولا . . . .تهاجــر وترمى بنفســـك ف الميـه ، واذا حظك حــلو وقبيت هناك تتجـــــوز لك واحده طليانيـه ، ولا توريهـم العين الحمــــــرا . . . . . ؟، او تعمـل فيهم عمـله كان نفسك تعملها واللى يجرا يجـــــــرا . . . . . . ؟، الصــراحه يا جماعة الخير الواحد خــلاص بقى مش عارف يعمـــــل ايه ، احنا اصــلنا بقينا فى زمن العجــايب
كلمــه للكـــاتب : لقد قــرأت مقاله كان صاحبهـــا زهقــان وكمان قرفــان من الاوضــاع الغريبة والعجــيبه ، فأردت ان اشــاركه مشــاعره ، ولكم تحيـــاتى
ليست هناك تعليقات:
إرسال تعليق