عمو ياعمو .. احكى لى حدوته
كلمات الفيلسوف الشاعر
قالت لى عمو يا عمو
احكى لى حدوته
بس تكون نهايتها سعيده
تكون فيها بنت حلوه وامورة
واسمها يكون زى اسمى كمان
قلت لها ماشى يا جودى
وقالت لى بس تكون حلوه الحدوته
وما فيهاش ولا واحد زعلان
قلت تمام
صلى ياجودى على نبينا
وقولى عليه الصلاة والسلام
كان فى بنت اسمها جودى
راحت ضحكت من قلبها ياسلام
كانت واقفه جوه جنينه ورد
والفراشات لونها جميل
سالتها ليه الوانك حلوه
ردت قالت علشان
الشمس ادتنى شوية الوان
والفراشات كل ماتطير
فوق ف السما عالى
تتغير الوانها كمان وكمان
حلوه ياجودى الحدوته ديه ؟
قالت لأ !؟ مش حلوه وملتوته
احترت اقول لها ايه ؟
فقلت طيب احكى انت الحدوته
لكن لو مش حلوه
ها قول ملتوته
زى ما قلتى انت تمام ؟
قالت كان فى فراشه بتطير
وجناحتها حلوه كتير
راحت صحرا وقعدت تمشى
وتمشى وتمشى وتمشى
..........
ها وبعدين قلت لها ياجودى
رجلى وجعتنى من كتر المشى
كفايه كده ابوس ايدك
خلاص قربت انام
قالت شافت ميه هناك ف الصحرا
اصلها كانت تعبانه وعطشانه كمان
قعدت تاكل وكمان تشرب
وكان فى جمل ف الصحرا
زيها برضه كان عطشان
وتوته توته حلوه الحدوته
قلت لها بسرعة وانا غضبان
طبعا مش حلوه الحدوته
فى ميه ياشيخه ف الصحرا
دى الحدوته طلعت ملتوته
وعملت نفسى قاعد زعلان !؟
قالت طيب نلعب لعبة تمساح
قلت ازاى ؟ اللعبه دى قولى لى
قال حط ايديك فوق بعض
زى بق التمساح مقفول
واى حد وحش ها يعدى أفتح ايديك
ياكله التمساح على طول
وكل الناس الى تاكلهم جوه ف بقك
اوعى تحطهم جوه فى بطنك
لان هانحبسهم ف شبكه حديد
وبعدين بص ياعمو
نروح رامينهم ع الشط بعيد
ايه رايك ف اللعبه دى اهيه
قولت لها يا جودى انا رايح انام !؟
قالت لى عمو يا عمو
احكى لى حدوته
بس تكون نهايتها سعيده
تكون فيها بنت حلوه وامورة
واسمها يكون زى اسمى كمان
قلت لها لأ .. يا جودى
خلاص انا نمت
حتى شوفى عينى مقفوله
وانا بيطق من عينى شرار
قالت أنت فاكرنى انا بنت عبيطه
انت لسه صاحى ياعمو يامكار ...
هذه الكلمات حوار حقيقى
دار بينى وبين ابنة زميل معنا
اثناء رحلتنا الى مدينة السويس
يوم الجمعه 8 مارس 2013
ارجو ان تعجبكم كلماتى
وتصبحوا على خير يا شطار
ليست هناك تعليقات:
إرسال تعليق