37. قال لى خــــلاص أنا ماشى
كلمات الفيلســـــــــــوف الشاعر
&&&&&&&&&&&&&&
1
وقالى أبنى ف يوم
خلاص أنا ماشى
خلاص مش قادر اتحمل
ها أروح يا أبويا بلاد الله
لخلق الله ، أشوف واتأمل ...
لجل احــــــــقق أحلامى
يمكن فى يوم أوصل
لازم يا ابويا اتغرب
وم الفكر والعذاب أهرب
وفى الحقيقة انا مخنوق
كمان الكون هنا ضيق
ومعادشى ليه مكان فيها
من الزحمـــــــة
والناس معادشى فى قلوبهم
ذرة حب ولا رحمه
&&&&&&&&
2
قلت آه يا ابنى يانور عينى
بلاش تروح وللافكار تخلينى
هاتعمل ايه بترحـــــالك
أنا أدرى بيك وبحالك
ومين يقف جنبك ويبقالك
هنا كتبت كلمة بحبك يابلدى ف كراسك
ورفعت ايدينك فى الفصل تشــــاور لاستاذك
وفاكر لما وقعت ع الارض !؟
وترابها ده باس خدك وباس راسك
هنا قلمك .. هنا فاسك
هنا اهلك .. هنا ناسك
هنا عمك .. هنا خالك
نفسى اشوف انا عيالك
ده انا عايزك تكون سندى
وفى الشدة تكون زندى
ومش قادر اقوم أمشى
تقول يابا خلاص هامشى؟
&&&&&&&&
3
رد وقال انا عارف
لكن انا تعبان .. انا خايف
لازم اســـــــــافر وأتغرب
انا مش رايح هناك العب
هأسافر لجل يا أبويا
اللقمة نلقــــــاها..
ندوقها من غير ما تكون
متغمـــــــسه بالذل
ولما أمشى برضو ها اخف الحمل
خلاص عزمت أسيب الدار
ولو هناك كنت هأعيش ف مرار
ده انا فى نار والعه بتكوينى
وتفر الدمعه من عينى
&&&&&&&&
4
قلت روح يا ابنى خلاص سافر
فى حفظ الله اشتغل .. عافر
ها ادعيلك ربى وانا ساجد
وعارف انك .. مش ولد جاحد
وانا فــــلاح على قدى بجلابية
ها أغنى عشانك غــــــــــنية
وأشق الارض وأشيل فاسى
أدب بيها الارض يطلع خير
تاكل منه اخواتك
وأنا وأمك وأحبابك
ولجل يزيد الخير
تاكل كل الخلايق منه
والبهايم وكمان الطير
ولا ف يوم تنحنى راسى
وها اكتب .. بكــــــره أحلى
ع الارض بدمى وبفاسى
&&&&&&&&
5
قال لى خلاص هافوت الدار
زهقت طهقت حاســس بالعار
ده انا شارب الذل من يومى
ودمعى سال على خدى وهدومى
ومن صغرى وانا شقـــــــــيان
بأمشى وادارى جنب حيطان ..
وتحت الارض ولا الديدان
وناس بتتلون زى الحيه جميع للوان
وناس قاســــــيه كما الحيوان
ونار والعه ومرار طافح
وقلبى طول عمره بينسى وبيسامح
وبان الدمـــــــــــع .. ف عيونى
وعارف انى ها أشقى وها أعانى
لكن أتكتب على الغلب يا زمانى
وأسيب احبابى وأهلى وخلانى
لكن عمرى ما هنساكم
هاعيش ليكم ووياكم
وارجع ليكم وهالقاكم
ياريت يا أبويا تريحنى
وقول لأمى تســــــــــــامحنى
ولو ف القلــــــــــــب حاجه تصارحنى
&&&&&&&&
6
قلت والدموع بتفر من عينى
بتكــــــــــوينى ..
بتهــــــــــرينى ..
بتدبحــــــــــنى ..
قلت خلاص روح أمشى
وأوعى لأحلامك ما توصلش
ولا عمر الخوف راح يخوفنى
ولا عادشــــــــى
وقلت آه يانى ..!؟
آه ياااااااااااااااانى
وصعبه الكلمه واجعانى
لكن خايف تتوه ف السكه وتعانى
سافر وخد وياك قلبى كمان
وخد منى قنطار حب وزيه حنان
ده انا دقت المرار كله زمان
علشان الاقــــيك هنا جنبى
&&&&&&&&
7
تقول هأسافر لجل أبنى !؟
فراقك صعب .. آااااااه يا بنى
انا الفلاح يا أقصـــــــى
جيت علشــــــانك...!؟
و هأزرع ورد وياسمين على بابك
وتعيشى يا بلدى حـره وتعيشى
ولا سيفك ف يوم يا جــلاد
هايقتلنى .. أو يخـــــوفنى
ولا ف يوم هأرضى ان الظلم يحكمنى
انا يا بنى مش طالب تشيل فاسك
على كتفك أوعلى راسك
لكن بلاش تبعد عشان ناسك
&&&&&&&&
8
تحب اقولك ها تبنى أزاى!؟
تعالى هنا وهات النـــــــــــــاى
وسمعنى غنوة بلدى وأحلى الحانك
ساعتها صحيح أكون ربيت
ومهما حصلك .. ومهما شقيت
ها تقول يابا أنا حبيت
وها ييجى يـــوم وتبنى البيت
وتزرع فيه فرحه وشجر الورد
ويزيد الحب ويزيد الــــــود
ها أقول ساعتها ف نفسى
هوه ده أبنى ..أيوه أبنى بجد
&&&&&&&&
ارجو أن تعجبكــــــــم كلماتى ولكم عاطـــــــر تحيــــــاتى
قاللى خــــلاص أنا ماشى ــ من ديــــوان حواديت مصـرية
ليست هناك تعليقات:
إرسال تعليق